រាជធានីភ្នំពេញ៖ នៅថ្ងៃទី២៤ ខែកក្កដា ឆ្នាំ២០២៦ ឯកឧត្តម ខូវ មករា រដ្ឋលេខាធិការក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងពិធីបិទបណ្ដុះបណ្ដាលស្ដីពី “លំហាត់សាយប័រក្រុមខៀវ” ដែលបានរៀបចំឡើងរយៈពេល២ថ្ងៃ ចាប់ពីថ្ងៃទី២២-២៤ ខែកក្កដា ឆ្នាំ២០២៦ នៅវិទ្យាស្ថានបច្ចេកវិទ្យាកម្ពុជា ក្នុងគោលបំណងពង្រឹងសមត្ថភាពរបស់សិក្ខាកាមជានិស្សិតក្នុងការកំណត់អត្តសញ្ញាណ វិភាគ និងឆ្លើយតបទៅនឹងឧប្បត្តិហេតុសាយប័រតាមរយៈការអនុវត្តលំហាត់សាយប័រជាក់ស្ដែង។
សូមជម្រាបជូនថា វគ្គបណ្តុះបណ្តាលនេះ ជាសកម្មភាពសហប្រតិបត្តិការរវាង គម្រោងឧបត្ថម្ភដោយទីភ្នាក់ងារសហប្រតិបត្តិការអន្តរជាតិជប៉ុនប្រចាំប្រទេសកម្ពុជាចំនួនពីរគឺ គម្រោងលើកកម្ពស់ភាពធន់នៃសន្តិសុខសាយប័រអនុវត្តដោយក្រសួងប្រៃសណីយ៍និងទូរគមនាគមន៍ និងគម្រោងពង្រឹងបណ្ដាញឧស្សាហកម្ម-សាកលវិទ្យាល័យ-សហគមន៍ដើម្បីពង្រឹងសមត្ថភាពស្រាវជ្រាវ និងអភិវឌ្ឍន៍វិស្វកម្មះអនុវត្តដោយវិទ្យាស្ថានបច្ចេកវិទ្យាកម្ពុជា។ ហើយកិច្ចសហការនេះមានគោលបំណងតភ្ជាប់បទពិសោធអនុវត្តជាក់ស្ដែងរបស់ក្រសួងក្នុងការអភិវឌ្ឍសមត្ថភាពសន្តិសុខសាយប័រជាមួយនឹងការអប់រំ និងការអភិវឌ្ឍធនធានមនុស្សផ្នែកវិស្វកម្ម ដើម្បីត្រៀមនិស្សិតឱ្យក្លាយជាធនធានមនុស្សប្រកបដោយសមត្ថភាព សម្រាប់ឆ្លើយតបទៅនឹងតម្រូវការសន្តិសុខសាយប័ររបស់វិស័យឧស្សាហកម្ម និងសង្គមឌីជីថលនាពេលអនាគត។
