January 19, 2020

Language:

សិក្ខាសាលានិន្នាការ និងបច្ចេកវិទ្យាក្នុងវិស័យបច្ចេកវិទ្យាគមនាគមន៍ និងព័ត៌មាន

រាជធានីភ្នំពេញ៖ ព្រឹកថ្ងៃព្រហស្បតិ៍ ១២កើត ខែចេត្រ ឆ្នាំរកា នព្វស័ក ព​.ស​.២៥៦១ ត្រូវនឹងថ្ងៃទី២៨ ​ខែមីនា ​ឆ្នាំ២០១៨​ នៅទីស្តីការ​ក្រសួង​ប្រៃសណីយ៍ ​និង​ទូរគមនាគមន៍​ មាន​រៀប​ចំសិក្ខា​សាលាស្តីពី​ “និន្នាការ​ និង​បច្ចេកវិទ្យា​ ក្នុង​វិស័យ​បច្ចេក​វិទ្យា​គមនាគមន៍ ​និងព័ត៌មាន”​ ក្រោមអធិបតីភាព​ ឯកឧត្ដម កាន ច័ន្ទមេត្តា ​រដ្ឋលេខាធិការ​ក្រសួង​ប្រៃសណីយ៍ ​និងទូរគមនាគមន៍ ​និង​មាន​ការចូលរួម​ពី ឯកឧត្ដម​ ហ៊ុយ ​វណ្ណៈ ​អនុរដ្ឋលេខាធិការ​ក្រសួង​មហាផ្ទៃ ​ឯកឧត្ដម​ លោក ​លោកស្រី ​មន្ត្រីរាជការ​ក្រសួង ​ព្រមទាំង​អ្នកសារព័ត៌មាន​នានា។​

ឯកឧត្ដម កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍

សិក្ខាសាលានេះបានរៀបចំឡើងក្រោមភាពជាដៃគូររវាងវិទ្យាស្ថានជាតិនីបទីក (NIPTICT) ​ជាមួយ​សហភាព​សហព័ន្ធ​អ្នក​សារព័ត៌មាន​កម្ពុជា​ ក្នុង​គោល​បំណង​ផ្សព្វ​ផ្សាយ​ដល់​ប្រព័ន្ធ​ផ្សព្វ​ផ្សាយ​នានា​ដូចជា ​កាសែត ​វិទ្យុ ​ទូរទស្សន៍​ ទស្សនាវដ្តី ​គេហទំព័រ​ និងបណ្តាញសង្គម ​។ល។ ​ដើម្បីស្វែងយល់​ពីនិន្នាការ​ទៅអនាគត​នៃការ​អភិវឌ្ឍ​របស់​បច្ចេកវិទ្យាថ្មីៗ​ ក្នុង​វិស័យ​បច្ចេក​វិទ្យាគមនាគមន៍ ​និងព័ត៌មាន។ ​ជាពិសេស ​ដើម្បីលើកកម្ពស់​ការ​ប្រើប្រាស់ ​“វាក្យស័ព្ទ”​ ក្នុងវិស័យ​បច្ចេក​វិទ្យាគមនាគមន៍ និង​ព័ត៌មាន ​ឲ្យបានត្រឹមត្រូវស្របទៅតាមអត្ថន័យ​បច្ចេកទេស​ ក្នុងពេលធ្វើការ​រាយការណ៍​អំពី ​សិក្ខាសាលា ​វេទិកា ​ឬព្រឹត្តិការណ៍​នានា ​ដែល​ទាក់ទង​នឹង​វិស័យ​បច្ចេក​វិទ្យា​គមនាគមន៍​ និង​ព័ត៌មាន​។

សមាជិកចូលរួមអង្គសិក្ខាសាលា

នៅក្នុងសិក្ខាសាលានោះដែរ លោក​ អ៊ូ ផាន់ណារិទ្ធ (OU Phannarith) ប្រធាននាយកដ្ឋានសន្តិសុខបច្ចេកវិទ្យា គមនាគមន៍ និងព័ត៌មាន បានធ្វើបទបង្ហាញមួយស្តីអំពី “បដិវត្តន៍នៃការគំរាមគំហែងតាមប្រព័ន្ធអ៊ិនធឺណិត – តើយើងត្រៀមខ្លួនរួចហើយឬនៅ? (Cyber Threat Revolution – Are we ready?)” ។

ប្រធានបទខាងលើនេះគឺមានគោលបំណងផ្តល់ជាចំណេះដឹង ទៅដល់អ្នកចូលរួមអំពីការគំរាមគំហែងនានាដែលកើតមានឡើងពីអតីតកាលរហូតមកដល់ពេលបច្ចុប្បន្ន។ ការប្រើប្រាស់បច្ចេកវិទ្យាមានការកើនឡើងជាលំដាប់ ស្របគ្នាទៅនឹងភាពងាយស្រួលក្នុងការទទួលបាននូវលទ្ធភាព (កម្មវិធី និងបច្ចេកទេស) សម្រាប់ជាយន្តការនៃការវាយប្រហារ បានធ្វើឲ្យវាមានការលំបាកណាស់ក្នុងការទប់ស្កាត់បើប្រៀបធៀបទៅនឹងអតីតកាល (១០ឆ្នាំមុន)។ ក្នុងពេលបច្ចុប្បន្ននេះ វត្ថុនានាចាប់ផ្តើមភ្ជាប់ទៅនឹងអ៊ិនធឺណិត​ មានដូចជា នាឡិការដៃ និងឧបករណ៍ប្រើប្រាស់នៅក្នុងផ្ទះជាដើម។

ទាញយកបទបង្ហាញទីនេះ >> 2018-CyberThreats-Evolution-Distribute

***Disclaimer: CamCERT own some of the content. Our purpose is pure to help spread the awareness, tips or other information related to security to everyone. Even though every information is true, accurate, completed and appropriate, we make no responsibility nor warranty since everything could go wrong.