សមាជិកនៃអង្គប្រជុំទាំងអស់បានធ្វើការផ្លាស់ប្តូរមតិយោបល់អំពីគោលនយោបាយសន្តិសុខសាយប័ររបស់ប្រទេសនីមួយៗ ក្នុងរយៈពេលមួយឆ្នាំកន្លងមក និងបានចែករំលែកអំពីស្ថានភាពនៃការគំរាមកំហែងសន្តិសុខសាយប័រនាពេលបច្ចុប្បន្នដែលកំពុងតែមានកើនឡើង និងស្មុគស្មាញស្របពេលនឹងការកើនឡើងនៃការប្រើប្រាស់បចេ្ចកវិទ្យាបញ្ញាសប្បនិម្មិត។
ប្រទេសសមាជិកអាស៊ាន និងជប៉ុនបានបញ្ជាក់អំពីកិច្ចខិតខំប្រឹងប្រែងរបស់ខ្លួនទៅលើសកម្មភាពជាច្រើន មានដូចជាការបញ្ជ្រាបការយល់ ការអនុវត្តលំហាត់ការពារហេដ្ឋារចនាសម្ព័ន្ធព័ត៌មានសំខាន់ៗ ការកសាងសមត្ថភាព ការសហការរវាងវិស័យសាធារណៈ ឯកជននិងអប់រំ ក៏ដូចជាការចែករំលែកព័ត៌មាន និងការជូនដំណឹងគ្នាទៅវិញទៅមកតាមការស្ម័គ្រចិត្តផងដែរ។
ស្របពេលនឹងកិច្ចប្រជុំនេះផងដែរ លំហាត់សន្តិសុខសាយប័រ (Tabletop Exercise) កម្រិតថ្នាក់ដឹកនាំ និងអ្នកបច្ចេកទេសបញ្ចូលគ្នាត្រូវបានរៀបចំឡើងដើម្បីពិភាក្សាអំពីហានិភ័យ ការគំរាមកំហែងសន្តិសុខសាយប័រ និងវិធានការការពារផ្សេងៗ។ លំហាត់សន្តិសុខសាយប័រនេះបានពិភាក្សាស៊ីជម្រៅទៅលើហានិភ័យ និងវិធានក្នុងការពារពីការវាយប្រហារប្រភេទមេរោគចាប់ជំរិត (Ransomware), ការវាយប្រហារទៅលើឧបករណ៍អុីនធឺណិតនៃវត្ថុ (Internet of Things) ការបោកប្រាស់ដោយប្រើបញ្ញាសប្បនិម្មិត (deepfake scam) និងបញ្ហាប្រឈមថ្មីៗពីបច្ចេកវិទ្យាឈានមុខផ្សេងៗ ដែលបានកើតឡើងក្នុងប្រទេសក្នុងតំបន់។ ប្រទេសនីមួយៗបានចែករំលែកអំពីវិធានការពារសំខាន់ៗ បទពិសោធន៍ល្អៗ និងសារៈសំខាន់នៃកិច្ចសហការរវាងរដ្ឋាភិបាលនិងក្រុមហ៊ុនធុរកិច្ច ក្នុងការពង្រឹងនិងទប់ស្កាត់ហានិភ័យសន្តិសុខសាយប័រ ដើម្បីជំរុញការអភិវឌ្ឍបច្ចេកវិទ្យាឌីជីថលប្រកបដោយសុវត្ថិភាព និងនិរន្តរភាព។
ថ្នាក់ដឹកនាំមកពីបណ្តាមកពីប្រទេសក្នុងតំបន់ក៏បានបញ្ជាក់ពីការប្តេជ្ញាចិត្តរួមគ្នា និងកិច្ចសហការតំបន់បន្ថែមទៀត ដើម្បីធ្វើឱ្យប្រសើរឡើងក្នុងការពង្រឹងភាពធន់សន្តិសុខសាយប័រកាន់តែប្រសើរនៅថ្ងៃអនាគត។
ឯកសារយោង៖ ក្រសួងប្រៃសណីយ៍ និងទូរគមនាគមន៍ – Ministry of Post and Telecommunications
