ឯកឧត្តមរដ្ឋលេខាធិការ ជុន វ៉ាត បានអញ្ជើញជាអធិបតីក្នុងវេទិកាស្តីពី សុវត្ថិភាពលើប្រព័ន្ធអនឡាញ ឆ្នាំ២០២៥ លើកទី២ ក្រោមមូលបទ៖ “កសាងទំនុកចិត្តក្នុងយុគសម័យបញ្ញាសិប្បនិម្មិត”

វេទិកានេះរៀបចំឡើងក្នុងគោលបំណងលើកកម្ពស់ការយល់ដឹងរបស់ប្រជាពលរដ្ឋកម្ពុជាអំពីហានិភ័យលើប្រព័ន្ធអនឡាញ ចែករំលែកចំណេះដឹងអំពីបច្ចុប្បន្នភាពបច្ចេកវិទ្យាបញ្ញាសិប្បនិម្មិត ឬ(Al) ជាពិសេស Generative AI ជា AI ជំនាន់ថ្មីដែលមានសមត្ថភាពផលិតមាតិកាល្អ និងមាតិកាមិនសមរម្យដែលអាចបង្កហានិភ័យ និង គ្រោះថ្នាក់ដល់សុខភាពសាធារណៈ និងសណ្តាប់ព័ត៌មានសង្គម។ វេទិកានេះរៀបចំឡើង២ទម្រង់ ក្នុងពេលតែមួយរួមមាន៖ កិច្ចពិភាក្សា (Panel Discussion) ចំនួន ៤ប្រធានបទ និងបន្ទប់សិក្ខាសាលអនុវត្តផ្ទាល់ (Practical Workshop) ចំនួន ២បន្ទប់ ដែលអនុញ្ញាតឱ្យសាធារណៈជនចូលរួម ដោយសេរី ព្រមទាំងមានការដាក់តាំងបង្ហាញសមិទ្ធផលសេវាសាធារណៈឌីជីថលរបស់ ក.ប.ទ. ផងដែរ។

ថ្លែងក្នុងឱកាសនេះ ឯកឧត្តមរដ្ឋលេខាធិការ បានមានប្រសាសន៍ថា វេទិកានេះជាការឆ្លុះបញ្ជាំងពីយន្តការសហការគ្រប់ភាគីពាក់ព័ន្ធ (Multistakeholder Approach) ជាយន្តការមានសារៈសំខាន់ ដើម្បីដោះស្រាយបញ្ហាគ្រោះថ្នាក់លើប្រព័ន្ធអនឡាញប្រកបដោយសុវត្ថិភាព និងមានប្រសិទ្ធភាព។ ជាការពិតជាក់ស្តែង ការរក្សាសន្តិសុខ និងសុវត្ថិភាពលើប្រព័ន្ធអនឡាញ ទាមទារការចូលរួមពីគ្រប់ភាគីពាក់ព័ន្ធ ក្នុងនោះរាជរដ្ឋាភិបាលជាអ្នកសម្រេចដាក់ចេញនូវគោលនយោបាយ ចំណែកវិស័យឯកជន ជាពិសេសក្រុមហ៊ុនបច្ចេកវិទ្យាឌីជីថលត្រូវការអនុវត្តវិធានបច្ចេកទេសទាំងឡាយដែលអាចការពារសុវត្ថិភាពផលិតផល សេវា និងអ្នកប្រើប្រាស់របស់ខ្លួន។ ក្នុងនោះផងដែរ អ្នកប្រើប្រាស់ត្រូវមាននូវការយល់ដឹងលើចំណុចសំខាន់ៗ ព្រមទាំងរបៀបការពារខ្លួន។

មុននឹងបញ្ចប់ ឯកឧត្តមរដ្ឋលេខាធិការ អំពាវនាវដល់អ្នកប្រើប្រាស់គ្រប់រូបបង្កើននូវការប្រុងប្រយ័ត្ន និងត្រូវអភិវឌ្ឍចំណេះដឹងខ្លួនលើផ្នែកសុវត្ថិភាពអនឡាញជាប្រចាំ ដើម្បីបង្កើនការរក្សាសុវត្ថិភាពរបស់ខ្លួននៅលើលំហសាយប័រ បានគ្រប់ជ្រុងជ្រោយ និងលើកទឹកចិត្តអ្នកចូលរួមទាំងអស់ចូលស្តាប់ និងសិក្សាពីបញ្ហា ព្រមទាំងវិធីសាស្រ្តនានាក្នុងបន្ទប់សិក្ខាសាលាដែលក្រុមការងារបានរៀបចំឡើងក្នុងវេទិកានេះ ដើម្បីបង្កើនការយល់ដឹង និងចូលរួមទាំងអស់គ្នាក្នុងការកសាងបរិស្ថានឌីជីថលប្រកបដោយសុវត្ថិភាពសម្រាប់ប្រជាជនជាពិសេសកុមារកម្ពុជា។